Hannes Hólmsteinn Gissurarson, uppgjafaprófessor, tekur upp hanskann fyrir Donald Trump í athugasemd við Facebook-færslu Illuga Jökulssonar, fjölmiðlamanns.

Illugi segir í færslu sinni að „fasisminn sé að færast yfir Bandaríkin með ógnarhraða“.

„Fasisminn færist yfir Bandaríkin með ógnarhraða. Nú síðast með brottrekstri grínistans Jimmy Kimmels. Á meðan flaðrar Bretland upp ódáminn. Margt misjafnt má um Churchill segja en ó, að Bretar ættu nú einhvern Churchill.“

Þó að langflestir sem skrifa undir færslu Illuga séu honum sammála, er Hannes Hólmsteinn Gissurarson ekki einn þeirra. Hann ritar:

„Þú misnotar (og um gengisfellir) orðið fasisma. Það orð hefur sérstaka merkingu. Mússólíni var fasisti. Hins vegar voru til dæmis Franco og Salazar ekki fasistar, heldur forræðissinnar (authoritarians) og afturhaldsmenn (reactionaries). Og Trump er ekki fasisti, heldur um margt stjórnlyndur populisti (tollar, harka í löggæslu) og um sumt frjálslyndur (skattalækkanir, afnám íþyngjandi reglugerða o. fl.).“

Illugi svarar uppgjafaprófessornum að bragði:

„Láttu ekki svona Hannes. Auðvitað má nota orðið fasisti um marga aðra stjórnlyndisofstopamenn en hinn ítalska Mussolini. Þú ættir nú að vita það. Við notum óhikað orðið kommúnisti um allskonar hópa sem hvorki Marx né Lenín myndu kannast að ráði við.“

Kristján nokkur svaraði Hannesi einnig og vakti athugasemd hans nokkra kátínu lesenda.

„Hannes er t.d. ekki sjálfstæðismaður heldur króníkapítalisti sem lifir á slímsetu við pottana. Það er rétt hjá honum að við eigum að vera mjög nákvæm í þess konar útlistingum.“