Fyrrverandi kærasta Mariusar Borg Høiby, sonur krónprinsessu Noregs, bar vitni fyrir dómi í dag, gegn Mariusi, sem sakaður er um 38 mismunandi brot.

Áhrifavaldurinn Nora Haukland og Marius Borg Høiby, sem oft er nefndur „aukaprinsinn“ (n. bonusprinsen), voru í sambandi í um eitt og hálft ár. Nú er Høiby grunaður um að hafa beitt hana bæði andlegu og líkamlegu ofbeldi nær allan þann tíma sem sambandið stóð yfir.

Haukland, sem er 28 ára, steig í vitnastúkuna í Héraðsdómi Oslóar, þar sem hún lýsti sambandi þeirra og þeirri þróun sem það tók. Hún sagði að hún hefði smám saman byggt upp mikinn ótta við hann og reiði hans.

Parið kynntist árið 2022 og hóf fljótlega samband. Haukland lýsti því hvernig hún varð fljótt ástfangin og heilluð af honum, en sagði jafnframt að fljótlega hafi farið að bera á óstöðugleika. Að hennar sögn sýndi hann tvær gjörólíkar hliðar: annars vegar glaðvær og hlýlegan mann sem hún treysti og taldi sinn besta vin, hins vegar mann sem hún gat ekki átt samskipti við þegar hann varð reiður.

Hún lýsti því að þegar skap hans breyttist hafi „augun orðið svört“ og að hún hafi verið skelfingu lostin þegar hún sá þessa hlið koma fram, enda vissi hún aldrei hvað myndi gerast næst.

Fljótlega hafi hann orðið afbrýðissamur og stjórnsamur, viljað ráða klæðaburði hennar, samskiptum og athöfnum. Hann hafi einnig haldið sambandi við konur sem hann hafði áður verið með og komið með leiðinlegar athugasemdir við vini hennar. Þegar hún gagnrýni hann fyrir það hafi hann brugðist reiður við.

Samkvæmt framburði Haukland hófst líkamlegt ofbeldi skömmu síðar. Hún sagði að hún hefði oft gengið á eggjaskurnum í samskiptum við hann, hann hafi öskrað á hana og ítrekað meitt hana líkamlega. Hún lýsti meðal annars atviki þar sem hún læsti sig inni í herbergi til að komast undan honum, en hann barði þá á hurðina og réðst síðar að henni inni í herberginu.

Hún sagði einnig að ofbeldið hefði átt sér stað ítrekað og að hún hefði upplifað bæði gaslýsingu og svokallað „love bombing“, þar sem hann ýmist beitti hana ofbeldi eða baðst afsökunar og lofaði bót og betrun. Þetta hafi orðið til þess að hún fór að efast um eigið mat á aðstæðum á sama tíma og óttinn jókst.

Við yfirheyrslur spurði saksóknarinn Sturla Henriksbø hvers vegna hún hefði ekki slitið sambandinu fyrr. Haukland svaraði að hún hefði lengi vonað að hlutirnir myndu batna, enda hefði hið góða í sambandinu verið sterkt og tilfinningarnar djúpar.

Parið sleit sambandinu árið 2023 eftir um eitt og hálft ár saman. Marius Borg Høiby er nú grunaður um alls 38 mismunandi brot. Hann hefur neitað öllum ásökunum um líkamlegt og andlegt ofbeldi.

Réttarhöldin halda áfram næstu þrjár vikur.