Björn Þorláksson, fjölmiðlamaður hjá Samstöðinni, gagnrýnir stjórnvöld harðlega í Facebook-færslu í tilefni af umfjöllun um áform heilbrigðismálaráðherra um að setja af stað átak gegn offitu Íslendinga.
Björn segir ríkisstjórnina skorta skilning á raunverulegum aðstæðum neytenda og viðskiptalífs hér á landi og lýsir henni sem veruleikafirrtu afli sem horfi fram hjá rót vandans.
„Ríkisstjórnin virðist blind á umhverfi viðskiptalífs hér á landi,“ skrifar Björn og bendir á að stjórnvöld hafi ítrekað sýnt vantraust á eigin mati. „Hún hélt að hægt yrði að treysta olíufélögunum um áramótin þrátt fyrir blóðuga sögu verðsamráðs þeirra. Ríkisstjórnin heldur að hollt muni lækka í matvörubúðunum. Hún virðist innilokuð í óraunveruleika.“
Hann segir fákeppni, samráð og helmingaskipti ráða ríkjum á íslenskum markaði og halda almenningi í heljargreipum. Sérstaklega nefnir hann bankakerfið sem dæmi um viðurstyggilegt viðskiptasiðferði.
„Fákeppni, helmingaskipti og samráð halda íslenskum neytendum í heljargreipum, viðurstyggilegastir eru bankanir með mun á innláns- og útlánsvöxtum sem engin heilbrigð þjóð í heilbrigðu umhverfi myndi láta bjóða sér,“ skrifar hann.
Björn spyr jafnframt hvers vegna stjórnvöld beiti ekki eignarhaldi sínu í ríkisbanka landsins til að knýja fram breytingar.
„Af hverju sýnir Kristrún ekki hugrekki og þvingar Landsbankann sem er í eigu okkar til að ganga á undan með góðu fordæmi og lækka útlánsvexti? Hinir bankarnir myndu neyðast til að elta.“
Hann gagnrýnir einnig að stjórnvöld láti mál eins og viðskiptasiðferði tryggingafélaga liggja á milli hluta.
„Viðskiptasiðferði tryggingafélaganna? En um þetta ræðir ríkisstjórnin ekki.“
Varðandi hugmyndir um sykurskatt segist Björn ekki alfarið andvígur slíkum aðgerðum, en telur þær tilgangslausar án raunverulegs inngrips stjórnvalda.
„Hitt er svo annað mál að sykurskattur getur vel verið góð hugmynd – en það er sama hvað reynt er nema yfirvöld grípi raunverulega í taumana.“
Að lokum segir hann að staðan á íslenskum markaði einkennist af stöðugum hækkunum sem bitni á almenningi.
„Það sem á að lækka gerir það ekki en allt hækkar alltaf endalaust, vegna ofsagróðafíknar fyrirtækja sem eru ráðandi á markaði og vinna við það að taka okkur almenning á hverjum degi í rass – afsakið orðbragðið – annars eiturhrezz á fallegum degi…“
