Í gær kynnti Reykjavíkurborg hina svokölluðu Reykjavíkurleið þegar kemur að leikskólamálum en borgin mun ekki rukka dvalargjald fyrir börn sem eru 36 tíma eða minna í leikskólum borgarinnar og hvatar verða settir til að stytta dvalartíma barna á föstudögum.
Svipuð leið hefur verið farin í Kópavogi og hafa margir foreldrar þar gagnrýnt fyrirkomulagið en þeir foreldrar sem ekki geta nýtt sér þetta munu þurfa að borga meira en þeir hafa gert á undanförnum árum, með einhverjum undantekningum.
Ósammála flokksfélaga
Ein af þeim sem hefur áhyggjur af þessari ákvörðun borgarinnar er Hildur Björnsdóttir, oddviti Sjálfstæðismanna, en það vekur vissulega athygli í ljósi þess að bæjarstjóri Kópavogs er úr röðum Sjálfstæðisflokksins og hefur ítrekað gortað sig yfir Kópavogsleiðinni.
„Ég hef áhyggjur af svokallaðri Reykjavíkurleið í leikskólamálum. Ég tel ólíklegt að tillögurnar stórbæti starfsaðstæður í leikskólum borgarinnar og óttast að þær leggist þungt á vinnandi foreldra. Rík áhersla er lögð á að bjóða ódýrustu leikskólana fyrir suma - í stað þess að stefna að bestu leikskólunum með öflugustu þjónustuna fyrir allar fjölskyldur,“ skrifar Hildur á Facebook.
„Reykjavíkurleiðin leiðir af sér bæði þjónustuskerðingu fyrir foreldra og auknar álögur fyrir vinnandi fólk - og fyllir foreldra sem fullnýta þjónustu leikskólanna óþarfa samviskubiti. Með gjaldskrárbreytingum er reynt að stýra fjölskyldum í skertan vistunartíma sem líklegt er að leggist þyngra á vinnandi mæður en vinnandi feður. Þetta þarf að mæla í framhaldinu en öflugt leikskólakerfi er eitt mikilvægasta jafnréttistólið á sveitarstjórnarstiginu. Fyrirliggjandi tillögur gera jafnframt ráð fyrir því að lokunardögum leikskóla fjölgi. Veruleikinn er sá að fjölskylda með tvö börn, eitt á leikskólastigi og eitt á grunnskólastigi, þarf nú að mæta hátt í 70 frídögum barna sinna - starfsdögum, skráningardögum, sumarleyfum og lokunardögum. Foreldrar á almennum vinnumarkaði eiga hins vegar aðeins um 24 til 30 frídaga árlega. Það sér hver maður hve snúinn þessi veruleiki getur reynst vinnandi foreldrum,“ heldur Hildur áfram.
Segist tilbúin að þjónusta Reykvíkinga
„Ítrekað er fjallað um lækkandi fæðingartíðini hérlendis. Börnum hefur ekki fjölgað svo neinu nemur í Reykjavík frá árinu 1998 og börnum á leikskólaaldri hefur fækkað síðastliðinn áratug. Við þurfum að standa betur með barnafólki - bjóða öflugri þjónustu og fjölbreyttari lausnir. Við sjálfstæðismenn höfum lengi kallað eftir því að starfsumhverfi leikskólanna verði fært til samræmis við grunnskólann. Þessu hafa leikskólakennarar kallað eftir enda fjöldi leikskólakennara sem hefur fært sig yfir í grunnskólann með tilkomu eins leyfisbréfs. Einhver skref eru stigin í þessa átt en ég hefði viljað sjá mun stærri skref. En hvaða þjónustu vilja fjölskyldur að loknu fæðingarorlofi? Þetta viljum við sjálfstæðismenn kanna, enda erum við til þjónustu reiðubúin fyrir fjölskyldur í Reykjavík. Tillögu þess efnis að kanna hvaða lausnum fjölskyldur kalla eftir var hins vegar hafnað nýverið af meirihlutanum,“ skrifar oddvitinn en athygli vekur að Hildur sér þó ákveðna jákvæða hluti í Reykjavíkurleiðinni hjá meirihlutanum.
„Á jákvæðu nótunum má þó fagna innleiðingu systkinaforgangs og að aukin íslenskukennsla standi nú starfsfólki til boða,“ skrifar hún að lokum
