Sjálfboðaliðar dýraverndarsamtakanna Villikettir á Austurlandi hafa nú 220 ketti í fóstri, sem er nærri því metfjöldi á þeim tíma sem samtökin hafa starfað. Með sumrinu framundan hefst einnig hinn árlegi kettlingatími, og því má búast við enn meiri fjölgun.

„Stundum gegnum vel að fá fólk til að taka að sér kettina en stundum illa og þetta er búið að vera rosalega erfitt ár í þessu í nokkuð langan tíma. Svo erum við farin að búa okkur undir enn meiri fjölgun því kettlingatímabilið er að hefjast og reynslan sýnir að þá getur fjölgað hratt á skömmum tíma,“ segir Helga Ósk Helgadóttir, einn af forsvarsfólki samtakanna í samtali við Austurfrétt. „Þetta er orðin svo mikil vinna meðan fjöldi sjálfboðaliða hefur ekki aukist mikið svo að það gengur stundum erfiðlega að manna vaktirnar hjá okkur og öll hjálp og aðstoð vel þegin. Þess utan eru flestir sjálfboðaliðarnir með hús sín full af köttum og geta illa eða alls ekki bætt fleirum við. Svo eru auðvitað þessar reglur hjá Múlaþingi að óheimilt er að halda fleiri en tvær kisur á heimili og það er lítið að hjálpa þegar fjöldinn er svona mikill.“

Mikið fjármagn fer í reksturinn, matur, lyf og lækniskostnaður safnast hratt saman. Samtökin óska þess að Múlaþing taki Fjarðabyggð sér til fyrirmyndar, en það sveitarfélag veitir fjárhagslegan stuðning við dýravelferð, meðal annars til geldinga. Múlaþing hins vegar veitir enga slíka aðstoð.

Þeir sem vilja leggja hönd á plóginn, hvort sem það er með því að taka kött í fóstur, styðja samtökin fjárhagslega eða með öðrum hætti, geta haft samband í gegnum Facebook-síðu Villikettir Austurlandi.