Ungt barn er illa haldið eftir drukknunarslys á hóteli í Caleta de Fuste á Fuerteventura en greint er frá þessu í fjölmiðlum á svæðinu.

Atvikið átti sér stað á miðvikudagskvöldið í sundlaug hótels á Caleta de Fuste-svæðinu í sveitarfélaginu Antigua. Barnið er breskt og var í fríi með foreldrum sínum og tveimur systkinum.

Sjúkrabílar voru sendir á vettvang. Þegar heilbrigðisstarfsfólk kom á staðinn var barnið í hjarta- og öndunarstoppi. Slökkviliðsmenn mættu einnig á staðinn og tóku þátt í endurlífgunaraðgerðum ásamt sjúkraflutningamönnum, sem að sögn stóðu yfir í um klukkustund við sundlaugina.

Barnið var í kjölfarið flutt með hraði á sjúkrahús á eyjunni, þar sem það er enn í alvarlegu ástandi. Á þessu stigi hafa engar frekari upplýsingar verið gefnar út um horfur barnsins eða nákvæmar aðstæður sem leiddu til slyssins.