Þrír erlendir ökumenn hafa verið ákærðir fyrir umferðarlagabrot á Suðurlandi og verða mál þeirra þingfest fyrir Héraðsdómi Suðurlands í nóvember. Mennirnir eru búsettir erlendis og er lögheimili þeirra í öllum tilvikum skráð óþekkt.

Einn mannanna er bandarískur og með óþekkt lögheimili í Bandaríkjunum. Honum er gefið að sök að hafa ekið á 128 kílómetra hraða á klukkustund um Suðurlandsveg við Skálaveg í Rangárþingi eystra í maí 2025. Leyfður hámarkshraði á veginum var 90 kílómetrar á klukkustund.

Annar maðurinn er með óþekkt lögheimili í Bretlandi. Hann er ákærður vegna alvarlegs umferðaratviks á Biskupstungnabraut í Grímsnes og Grafningshreppi í nóvember 2024. Samkvæmt ákæru ók maðurinn undir áhrifum kannabisefnis.

Honum er gefið að sök að hafa ekið yfir á öfugan vegarhelming skammt austan við Þrastarlund og í veg fyrir bifreið sem kom úr gagnstæðri átt. Árekstur varð og höfnuðu báðar bifreiðarnar utan vegar. Auk refsingar og greiðslu sakarkostnaðar er þess krafist að maðurinn verði sviptur ökurétti.

Þriðji maðurinn er með óþekkt lögheimili í Frakklandi. Hann er ákærður fyrir að hafa ekið á 113 kílómetra hraða á Suðurlandsvegi við Botnaveg í Skaftárhreppi í ágúst 2025 þar sem hámarkshraði var 90 kílómetrar.

Öll málin verða þingfest fyrir Héraðsdómi Suðurlands 19. nóvember.