Fimm manns, þar af þrjú börn, létust þegar fjölbýlishús hrundi í Istanbúl í Tyrklandi snemma í gærmorgun. Níu manns var bjargað á lífi úr rústunum.

Björgunaraðgerðum lauk snemma í dag þegar lík síðasta fórnarlambsins fannst undir rústunum. Að sögn skrifstofu borgarstjórans í Istanbúl voru börnin sem létust tvær stúlkur, fimm og tíu ára, og tólf ára drengur. Tveir fullorðnir létust einnig.

Húsið hrundi með óvenjulegum hætti. Þrjár neðstu hæðir þess gáfu sig en fjórar efri hæðir sátu eftir ofan á rústunum.

Nuri Aslan, aðstoðarborgarstjóri Istanbúl, segir að húsið hafi verið reist árið 1987. Kjallari, jarðhæð og fyrstu tvær hæðirnar hafi verið byggðar samkvæmt þeim reglum sem giltu á þeim tíma. Fleiri hæðum hafi hins vegar verið bætt við síðar.

Alls hafa 55 íbúar nærliggjandi húsa verið fluttir á brott í varúðarskyni á meðan yfirvöld meta ástand bygginga á svæðinu.

Tyrkneskir fjölmiðlar hafa eftir verslunarstjóra á jarðhæð hússins að sprungur hafi verið sjáanlegar í byggingunni frá því í apríl.

Atvikið hefur vakið upp spurningar um öryggi eldri bygginga í Istanbúl. Tyrkneskir fjölmiðlar áætla að allt að 1.200 byggingar í borginni kunni að vera í hættu á hruni vegna galla í byggingu eða lélegra byggingarefna. Í ágúst hrundi mannlaus bygging í borginni, en enginn slasaðist í því atviki.