Eftir að hafa myrt þrjá menn á hrottafenginn hátt árið 2013 var breski raðmorðinginn Joanne Dennehy dæmd í ævilangt fangelsi. Amazon Prime sýnir nú heimildarmyndina um hana sem ber heitið Confessions of a Female Serial Killer.
Mál hennar er þekkt sem Peterborough-skurðamorðin, en Dennehy myrti þrjá menn og varpaði líkum þeirra í skurði við útjaðar Peterborough. Þar með lét hún ekki staðar numið, tveir aðrir menn fundust illa stungnir en komust lífs af. Þrátt fyrir að hafa virst venjuleg út á við, var Dennehy allt annað en það. Hún viðurkenndi að hún hefði fengið „smekk“ fyrir því að drepa menn. Sjálf var hún fráhverf tveggja barna móðir og sagðist eingöngu ætla að gera karlmönnum mein, en hlífa konum, sérstaklega mæðrum með dætur.
Vinur hennar, Mark Lloyd, sagði að hún hefði áður sagt honum að markmið sitt væri að drepa níu menn. Fyrir henni var þetta „afþreying“ og hún átti að hafa sagt: „Ég vil bara skemmta mér“. Hún sagði síðar við geðlækni að eftir fyrsta morðið hefði hún „fengið lyst á þessu“.
Hún útskýrði hugsun sína þannig: „Ég vil ekki láta stjórna mér af neinum. Ekki af lögfræðingum, ekki af lögreglu, ekki af neinum.“
Fórnarlömbin
Lukasz Slaboszewski: 31 árs pólskur ríkisborgari sem sagði vini sínum að „lífið væri nú dásamlegt“ eftir að hafa hitt Dennehy, sem hann taldi vera kærustu sína. Slaboszewski var lokkaður á eign undir því yfirskini að hitta Dennehy og síðan stunginn til bana. Dennehy henti síðan líkinu í ruslatunnu og sýndi það 14 ára stúlku (sem hún neitaði fyrir dómi, en dómarinn úrskurðaði að hefði gerst út frá framburði unglingsins). Hann var myrtur einhvern tíma á tímabilinu 19-29 mars.
John Chapman: 56 ára gamall herbergisfélagi Dennehy, sem var stunginn 29. mars. Honum var lýst sem „vingjarnlegum og meinlausum manni sem hafði þjónað landi sínu í breska sjóhernum en hafði lent í erfiðleikum vegna áfengisfíknar sinnar“.
Kevin Lee: 48 ára gamall leigusali hennar, faðir og eiginmaður, sem einnig var fyrrverandi elskhugi Dennehy, var einnig myrtur 29. mars eftir að hafa verið stunginn fimm sinnum í hjartað. Lík hans fannst síðar í glitrandi svörtum samkvæmiskjól og var hent í skurð nálægt Newborough. Talið er að hún hafi klætt hann í kjólinn til að niðurlægja hann.
Greind siðblind og hættuleg
Eftir mat geðlæknis var hún greind siðblind með jaðarpersónuleikaröskun. Þetta sást meðal annars þegar hún hló ítrekað í réttarsalnum. Dómarinn, Mr. Justice Spencer, lýsti henni sem „grimmum, útsmognum, eigingjörnum og stjórnsjúkum raðmorðingja“.
Það kom því ekki á óvart að hún var dæmd í ævilangt fangelsi án möguleika á reynslulausn. Hún varð þá aðeins þriðja konan í breskri sögu sem hlaut slíka refsingu, á eftir hinum alræmdu Myru Hindley og Rosemary West.
