Við Smyrlahraun 19 í Hafnarfirði er komið á sölu stórt og vel staðsett einbýlishús sem býður upp á fjölbreytta nýtingarmöguleika.

Um er að ræða 360,7 fermetra hús sem skiptist í tvær rúmgóðar 5 herbergja íbúðir ásamt tvöföldum bílskúr. Ásett verð er 179,9 milljónir króna, sem jafngildir innan við hálfri milljón á fermetra.

Húsið var byggt árið 1972 og teiknað af arkitektinum Kjartani Sveinssyni. Efri hæð hússins er að mestu í upprunalegu ástandi, en neðri hæð hefur verið endurnýjuð á undanförnum árum og er því í góðu standi. Efri hæð er skráð 175,5 fermetrar að stærð en neðri hæðin 136,8 fermetrar. Tvöfaldur bílskúr er 48,6 fermetrar og býður upp á gott geymslu- og vinnurými með steyptu gólfi og tveimur innkeyrsludyrum.

Lóðin er 687 fermetrar, gróin og skjólgóð með trjágróðri við lóðarmörk. Húsið snýr til suðausturs og nýtur því góðrar birtu. Við efri hæð er verönd við inngang en við neðri hæð er hellulagt svæði bæði að framan og aftan. Fyrir framan húsið er stór, steypt innkeyrsla með nægum bílastæðum.