Breski tónlistarmaðurinn og dæmdi barnaníðingurinn Gary Glitter er sagður alvarlega veikur í fangelsi og gæti verið „á síðasta snúningi“, samkvæmt heimildum.
Glitter, sem heitir réttu nafni Paul Gadd, er 81 árs og afplánar dóm í HMP Channings Wood-fangelsinu í Devon. Hann var kallaður aftur í fangelsi í mars 2023 eftir að hafa brotið skilyrði reynslulausnar.
Samkvæmt heimildum hefur heilsu hans hrakað verulega. Hann er sagður nær heyrnarlaus, bundinn við hjólastól og neiti að yfirgefa klefa sinn.
Heimildarmaður sagði við The Sun að ástand hans væri mjög slæmt:
„Hann er heyrnarlaus og getur varla hreyft sig, og flestir myndu ekki þekkja hann lengur. Hann virðist vera á síðasta snúningi, líkaminn er að gefast upp.“
Glitter var dæmdur árið 2015 fyrir kynferðisbrot gegn barni undir 13 ára aldri, tilraun til nauðgunar og fjórar ákærur um ósæmilegar árásir. Hann var látinn laus tímabundið áður en hann var aftur handtekinn og færður í fangelsi.
Synjað um reynslulausn
Á síðasta ári var honum synjað um reynslulausn þar sem matsnefnd taldi hann enn skorta samkennd með fórnarlömbum. Þá hefur einnig verið bent á að hann sýni áfram óstjórnlega kynferðislega hneigð til barna.
Í niðurstöðu nefndarinnar kom fram:
„Að mati nefndarinnar sýnir herra Gadd áfram óstjórnlega áhuga á börnum fyrir kynþroska. [...] Nefndin var ekki sannfærð um að það væri öruggt fyrir almenning að sleppa honum úr haldi á þessum tímapunkti.“
Þrátt fyrir þetta telja bæði fangar og starfsmenn fangelsisins að hann gæti látist innan múranna.
„Ef hann fær ekki reynslulausn fljótlega telja flestir að hann muni eyða síðustu árum sínum í fangelsi,“ sagði heimildarmaður.
Óvinsæll meðal fanga
Samkvæmt heimildum er Glitter ekki vinsæll meðal annarra fanga og sé talinn hrokafullur.
Áfrýjun hans um lausn var tekin fyrir árið 2025 en henni var hafnað þar sem hann var talinn áfram hættulegur börnum, eins og kemur fram hér fyrir ofan. Sálfræðimat benti einnig til þess að hann héldi enn viðhorfum sem réttlættu kynferðisofbeldi gegn börnum.
Í samantekt málsins kom fram að hann sjálfur viðurkenndi að hann ætti ekki að vera látinn laus að svo stöddu og þyrfti frekari meðferð innan fangelsisins.
