Hallgrímur Helgason rithöfundur sagðist hafa fylgst spenntur með Alþingi í morgun þar sem málþófið væri orðið líkt og hans EM. Hann varð hins vegar gáttaður á „furðulegri uppákomu“ þegar einungis þrír af 30 þingmönnum stjórnarandstöðunnar voru mættir til þess að greiða atkvæði um eigin tillögu.

Klukkan 10:00 hófst nýr þingfundur eftir að þingfundur gærdagsins varði fram til 1:09 þar sem umræðurnar um veiðigjaldið drógust á langinn. Hildur Sverrisdóttir, þingflokksformaður Sjálfstæðisflokksin, var með fyrsta mál á dagskrá en það var dagskrártillaga um að þingið myndi taka fyrir fjármálaáætlun í stað frumvarpanna um strandveiðar og veiðigjaldið sem voru á dagskrá. Flokksformenn hinna flokkanna í stjórnarandstöðunni tóku einnig til máls og studdu tillögu Hildar Sverrisdóttur. Það voru Ingibjörg Ólöf Isaksen, þingflokksformaður Framsóknarflokksins og Bergþór Ólason, þingflokksformaður Miðflokksins.

Stjórnarandstaðan vill ljúka afgreiðslu fjármálaáætlunarinnar því það er lögbundin skylda Alþingis að ljúka við hana áður en þingi er slitið. Ríkisstjórnarflokkarnir forgangsraða hins vegar að klára afgreiðslu frumvarpsins um veiðigjöldin og vilja ekki ljúka við fjármálaáætlunina fyrr en frumvarpið hefur verið afgreitt.

Í atkvæðagreiðslunni um dagskrártillögu stjórnarandstöðunnar var hún felld með 33 atkvæðum gegn þremur frá stjórnarandstöðunni. Það gefur til kynna að einungis þingflokksformennirnir sem tóku til máls voru mætt til að greiða atkvæði með eigin tillögu.

„Er þetta einhver klaufaleg afleiðing málþófsins eða er stjórnarandstaðan orðin ga ga?“ skrifar Hallgrímur Helgason í færslu sinni á Facebook.

„Þetta er leið til að neyða stjórnarliða í hús til að greiða atkvæði,“ útskýrir Þórhildur Sunna Ævarsdóttir, fyrrum þingmaður Pírata, í athugasemd við færslu Hallgríms.

Ásta Lóa Þórisdóttir, þingkona Flokks fólksins og fyrrverandi ráðherra, vekur einnig athygli á þessari atburðarás í færslu á Facebook. „Ef þessar tölur sýna ekki fram á þá pólitísku leiki sem minnihlutinn er í, veit ég ekki hvað gerir það. Þau nenna ekki einu sinni að mæta til að tala fyrir eða greiða atkvæði um eigin tillögu,“ skrifar hún í færslunni.