SCS Software hefur tilkynnt að Íslandi verði bætt við tölvuleikinn Euro Truck Simulator 2.

Leikurinn er einn vinsælasti „pabbaleikur“ sem komið hefur út en streituleysi og rólegheit eru einkennandi fyrir slíka leiki. Samkvæmt upplýsingum frá útgefanda leiksins hefur leikurinn selst meira en 13 milljónum eintaka. Í leiknum bregður spilarinn sér í hlutverk vöruflutningabílstjóra sem keyrir með vörur milli borga og bæja í Evrópu. Í tilkynningu um Íslandsviðbótina segir að spilarar muni geta keyrt hringveginn og heimsótt hina og þessa bæi og borgir.

Ekki er þó búið að gefa upp nákvæma dagsetningu hvenær Íslandi verði bætt við en tilkynnt verður um það á næstunni að sögn tölvuleikjafyrirtækisins.