Jón Gnarr afþakkaði boð Stefáns E. Stefánssonar um að mæta Heiðrúnu Lind Marteinsdóttur í Spursmálum. Stefán sagðist þó hafa verið að grínast.

Mannlíf sagði frá Facebook-færslu þingmannsins Jóns Gnarr á dögunum en þar benti hann á að Heiðrún Lind Marteinsdóttir, framkvæmdarstjóri SFS, hafi mætt í viðtal um veiðigjaldið hjá Vísi en hún er einnig stjórnarmeðlimur Sýnar, sem á Vísi. Í kjölfar færslunnar brugðust sumir ókvæða við í athugasemdum, þar á meðal Erla Björg Gunnarsdóttir, ritstjóri fréttastofu Stöðvar 2, Vísis og Bylgjunnar, sem sakaði Jón um aðför að lýðræðinu, með færslu sinni.

Blaðamaðurinn og siðfræðingurinn Stefán E. Stefánsson, sem hefur verið í vandræðum með að finna viðmælendur í þátt sinn Spursmál á mbl.is, að undanförnu, skrifaði einnig athugasemd og bíður Jón í þáttinn:

„Jæja Jón Gnarr. Nú er ekki annað að gera en að mæta Heiðrúnu Lind í Spursmálum. Hvorugt ykkar situr í stjórn Árvakurs þótt þar væruð þið efalaust þyngdar ykkar virði í gulli.“

Stefán bætti síðan við athugasemd: „Jón Gnarr sæki þig í Paulsen, Skeifunni 2 kl 8:00 á fimmtudagsmorgun.“

Jón Gnarr svaraði Stefáni að bragði en hann var hreint ekki á því að þiggja boð siðfræðingsins.

„Það þætti ykkur nú gaman! að fá að djöflast aðeins í ræflinum mér. Hún gæti hrifið mig með talnaspeki sinni og þú tekið undir, milli þess sem þú sakaðir mig um aðför gegn lýðræði. Svo gætir þú spilað einhvern gamlan skets með mér. Ég ætla því að fá að afþakka þetta góða en samt fyrirsjáanlega boð. Fáðu frekar einhvern sem er með eitthvað bitastætt og bragðgott til að troða uppí þig. Nolite te bastardes carborundorum.“

Gervilatínan sem Jón skrifaði í lok svarsins merkir í lauslegri þýðingu „Láttu ekki óþokkana mala þig niður“ og er þekkt úr skáldsögunni The Handmaid’s Tale eftir Margaret Atwood, þar sem hún birtist sem leynilegt mótstöðuslagorð. Hún hefur orðið vinsæl sem hvatningarorð gegn kúgun og óréttlæti, þrátt fyrir að vera málfræðilega röng latína.

Stefán svaraði Jóni og sagðist bara hafa verið að grínast.

„Ég var nú bara að grínast líka. Myndi ekki nenna að ræða kvótakerfið við þig. Okkar slóðir liggja saman annarsstaðar. En, hvar er þitt fólk, sem allt þykist vita um þessi mál? Af hverju þora þeir miklu meistarar ekki að rökræða þessi mál?

Varla geta rökin verið þau að ég sé ómálefnalegur. Ef svo væri, væri sigur þeirra í kappræðunum vís. Ekki satt?“

Enn bíður siðfræðingurinn eftir svari frá Gnarr.