„Það er dálítið óþægilegt þegar maður er sestur niður í notalegheitum í sveitinni að heyra skothvelli fyrir utan og finna svo nýdauða fugla skammt frá húsinu, sjá bíla keyra fram og aftur og menn stara í sjónaukum heim að húsinu.“
Þannig segir Vigfús Hjörtur Jónsson, eigandi sumarbústaðar í Vopnafirði, frá þeirri óhugnanlegu reynslu sem hann og fjölskylda hans urðu fyrir um liðna helgi þegar kyrrðin í sveitinni var rofin af byssuskotum. Fjölskyldan hafði farið í bústaðinn til að njóta friðar og hvíldar í faðmi náttúrunnar, en í stað þess urðu þau vitni að skotveiðum í nágrenninu. Við nánari athugun fundust nokkrar nýdauðar rjúpur rétt við bústaðinn, og Vigfús tók eftir veiðimönnum sem virtust skjóta fugla beint úr bílum sínum.
„Það var aðili sem ók þarna fram og aftur á veginum skammt frá bústaðnum, beindi sjónauka ítrekað að bústaðnum og skaut svo óhikað í áttina beint úr bíl sínum. Ég geri ráð fyrir að menn viti af því að hér er trjálundur þar sem nokkrar rjúpnafjölskyldur halda sig gjarnan oft yfir allan veturinn. Ég hef reglulega verið að týna upp skothylki á vorin svo þetta er hreint ekki í fyrsta skipti sem verið er að skjóta þarna um slóðir. Þá virðast þeir lítið virða afgirt einkalönd því hér sáust spor víða innan girðingar.“
Vigfús segist undrandi á því að veiðimenn sýni ekki meiri aðgæslu, sérstaklega þar sem margir dvelji nú yfir veturinn í sumarbústöðum sínum, oft í skógi eða trjálundum þar sem rjúpur leita sér skjóls.
„Ég hélt að það væri nóg pláss annars staðar til að stunda veiðar en niður í byggð. Stór heiðalönd og heilu eyðidalirnir þar sem engin er byggð og skotveiði hvorki truflar né veldur hættu.“
Lögreglan á Austurlandi segir engar formlegar tilkynningar hafi borist um rjúpnaveiði í sumarbústaðalöndum á yfirstandandi veiðitímabili. Hins vegar segir Hjalti Bergmann Axelsson, aðstoðaryfirlögregluþjónn, að lögreglan hafi virkt eftirlit með slíku meðan á veiðum stendur, og bendir á að það sé stranglega bannað að hafa hlaðin skotvopn í ökutækjum.
