Dómsmálaráðuneytið hefur auglýst laust til umsóknar embætti lögreglustjórans á höfuðborgarsvæðinu en greint er frá þessu í tilkynningu frá stjórnvöldum.

Leitað er að öflugum og framsýnum leiðtoga með reynslu af stjórnun og umbótastarfi sem geti leitt fjölbreyttan hóp starfsfólks í gegnum þróun og breytingar í starfsemi embættisins.

Lögreglustjórinn á höfuðborgarsvæðinu fer með stjórn lögregluliðs í stærsta lögregluumdæmi landsins, þar sem fjórar lögreglustöðvar starfa. Embættið ber ábyrgð á daglegri stjórn og rekstri lögreglunnar á höfuðborgarsvæðinu auk framkvæmdar lögreglustarfa innan umdæmisins.

Fram kemur í auglýsingunni að lögreglustjórinn eigi sæti í lögregluráði, sem hefur það hlutverk að efla samráð milli lögreglustjóra og samhæfa störf lögreglu á landsvísu.

Gerðar eru ríkar kröfur til umsækjenda, meðal annars um öfluga leiðtogahæfni, reynslu af stjórnun og góða samskipta- og samstarfshæfni. Þá er þekking á verkefnum lögreglu, rekstri og breytingastjórnun talin kostur. Umsækjendur þurfa jafnframt að hafa mjög gott vald á íslensku og ensku, bæði í ræðu og riti.

Dómsmálaráðherra skipar í embættið til fimm ára í senn samkvæmt lögum um réttindi og skyldur starfsmanna ríkisins.

Umsóknarfrestur rennur út 26. júní næstkomandi