Sex einstaklingar voru úrskurðaðir í gæsluvarðhald í Héraðsdómi Reykjavíkur í gær í tengslum við umfangsmikla rannsókn lögreglu á fíkniefnamisferli og peningaþvætti. Þetta kemur fram í tilkynningu frá Lögreglunni á höfuðborgarsvæðinu.

Lögregla réðst í viðamiklar aðgerðir á nokkrum stöðum á höfuðborgarsvæðinu í þágu rannsóknarinnar. Í aðgerðunum voru framkvæmdar húsleitir og nokkrir einstaklingar handteknir.

Jafnframt var lagt hald á bæði fíkniefni og fjármuni.

Sex þeirra sem handteknir voru voru í kjölfarið leiddir fyrir Héraðsdóm Reykjavíkur, þar sem þeir voru úrskurðaðir í gæsluvarðhald til föstudags. Samkvæmt tilkynningu lögreglu eru þeir allir íslenskir ríkisborgarar.

Lögregla segir rannsókn málsins mjög umfangsmikla. Ekki sé unnt að veita frekari upplýsingar um málið að svo stöddu.