Það verður tekið vel á því í söngnum á Borgarbókasafninu Spönginni á laugardaginn þegar gítarleikarinn og gleðigjafinn Valgeir Gestsson, betur þekktur sem Valli, leiðir gesti í hressilegum samsöng.

Viðburðurinn ber heitið Komdu að syngja og fer fram laugardaginn 26. september frá klukkan 13:00 til 13:45. Þar verða raddböndin þanin og slegið á létta strengi við nokkrar af helstu perlum íslenskrar dægurlagasögu.

Á dagskránni verður gamalt og gott efni sem flestir ættu að kannast við og því ætti enginn að þurfa að sitja þögull úti í horni. Sönghæfileikar eru heldur alls ekkert skilyrði fyrir þátttöku enda snýst stundin fyrst og fremst um að hafa gaman saman. Textum laganna verður varpað upp á skjá svo enginn þurfi að hafa áhyggjur af því að ruglast í erindunum.

Viðburðurinn hentar allri fjölskyldunni en einnig vinahópum sem vilja taka sig saman og byrja laugardaginn á góðri söngstund.

Komdu að syngja verður fastur liður í Spönginni í vetur og verður samsöngurinn á dagskrá einu sinni í mánuði frá hausti og fram á vor.

Aðgangur er öllum opinn og gestir þurfa aðeins að mæta með söngröddina – hvernig sem hún kann að hljóma.