Forsendur fyrir varanlegri búsetu og skólahaldi í Grindavík eru nú taldar ásættanlegar, að því gefnu að öryggisráðstafanir séu virkar. Þetta eru helstu niðurstöður úr nýjum hluta endurskoðas áhættumats fyrir bæinn sem ríkisstjórnin fjallaði um í gær og segir á vef forsætisráðuneytisins. Með þessu breytist fyrra mat stjórnvalda frá því í apríl og er nú stefnt að því að bjóða Grindvíkingum að kaupa íbúðarhúsnæði sitt í bænum til baka.
Nýja áhættumatið bendir til þess að unnt sé að halda áhættu fyrir þá sem dvelja eða starfa í Grindavík innan sambærilegra marka og í öðrum byggðarlögum á Íslandi sem búa við langvarandi náttúruvá. Í apríl síðastliðnum var það mat ríkisstjórnarinnar að ekki væru forsendur til að hefja skólahald eða stuðla að aukinni búsetu barna í bænum, en stjórnvöld telja þær forsendur nú breyttar.
Ógnin áfram viðvarandi
Þrátt fyrir rýmri heimildir og jákvæðara mat er óvissunni vegna náttúruvárinnar ekki lokið. Í tilkynningu stjórnvalda kemur fram að aðstæður í Grindavík séu áfram sérstakar þar sem ógnin er viðvarandi allan sólarhringinn og allt árið um kring, allt þar til goslokum hefur verið lýst yfir. Áfram verður fylgst náið með þróun mála og þess gætt að vöktun, viðvörunarkerfi og rýmingaráætlanir séu ávallt virkar. Ríkisstjórnin leggur sérstaka áherslu á að hagsmunir og velferð barna séu í fyrirrúmi við allar ákvarðanir um búsetu og skólahald.
Undirbúa endurkaup fasteigna
Niðurstöðurnar munu nýtast Grindavíkurbæ, ríkinu og öðrum hagsmunaaðilum sem grundvöllur að næstu skrefum við endurreisn bæjarins. Liður í því er að hefja markvisst og í áföngum undirbúning að því að bjóða Grindvíkingum að kaupa aftur íbúðarhúsnæði í bænum, kjósi þeir það.
Vinnan við endurskoðun áhættumatsins hefur staðið yfir undanfarna mánuði þar sem fjöldi sérfræðinga, hagaðila og íbúa komu að borðinu. Sjónum var sérstaklega beint að öryggi við daglega dvöl og hugsanlega rýmingu, samfelldu skólahaldi og öryggi húsnæðis.
Vinnu við heildstætt áhættumat verður haldið áfram og verður það endurskoðað reglulega. Niðurstöður þess hluta sem nú liggur fyrir verða kynntar nánar á íbúafundi í Grindavík í kvöld.
