Héraðsdómur Reykjaness hefur dæmt Alendis ehf. til að greiða Embrek Snæ Arnarssyni, fyrrverandi tæknistjóra félagsins, 764.108 krónur vegna vangoldinna launa og orlofs. Upphafleg krafa hans nam rúmlega 1,7 milljónum króna.
Embrek Snær var ráðinn í fullt starf sem tæknistjóri, eða CTO, hjá Alendis í desember 2023. Starf hans fól meðal annars í sér að stýra útsendingum frá hestaíþróttamótum og tryggja gæði streymis til áhorfenda. Samkvæmt ráðningarsamningi átti hann ekki rétt á sérstakri greiðslu fyrir yfirvinnu heldur skyldi aukið vinnuframlag jafnað með frítöku.
Hann sagði starfi sínu lausu í maí 2024 og krafðist síðar greiðslu vegna meðal annars yfirvinnu, frítökuréttar og vangoldinna launa. Dómurinn taldi honum ekki hafa tekist að sanna kröfur vegna yfirvinnu í maí og júní. Tímaskráningar hans hefðu verið einhliða og komið fram nokkru eftir starfslok.
Öðru máli gegndi um laun fyrir júlí 2024. Alendis hafði greitt Embrek Snæ 187 þúsund krónur fyrir mánuðinn en full mánaðarlaun hans námu 877.625 krónum. Dómurinn taldi gögn málsins sýna að hann hefði verið við störf allan júlímánuð að því marki sem ráðningarsamningurinn kvað á um.
Alendis var því gert að greiða honum 690.625 krónur í vangoldin laun auk 73.483 króna í orlof, samtals 764.108 krónur, ásamt dráttarvöxtum frá 1. ágúst 2024. Hvor aðili ber sinn málskostnað.
