Valur Helgi Kristinsson hefur verið fastráðinn yfirlæknir hjá Heilbrigðisstofnun Norðurlands, HSN, á Akureyri og Arna Reynisdóttir ráðin aðstoðaryfirlæknir. Bæði eru þau sérfræðingar í heimilislækningum.

Þetta kemur fram í tilkynningu frá HSN.

Valur hefur gegnt starfi yfirlæknis frá því í janúar á þessu ári. Hann lauk embættisprófi frá læknadeild Háskóla Íslands árið 2000 og sérnámi í heimilislækningum á Húsavík og í Örebro í Svíþjóð árið 2007. Að námi loknu starfaði hann sem heimilislæknir í Lundi í Svíþjóð.

Valur hefur starfað við heilsugæsluna á Akureyri frá árinu 2009, að undanskildu stuttu hléi árið 2024 þegar hann starfaði sem heimilis- og trúnaðarlæknir hjá Heilsuvernd.

Arna hóf upphaflega nám í lyfjafræði við Háskóla Íslands en sneri sér síðar að læknisfræði. Hún lauk læknanámi frá Debrecen í Ungverjalandi árið 2017 og flutti í kjölfarið heim til Akureyrar.

Arna sinnti sérnámsgrunnnámi á Sjúkrahúsinu á Akureyri og hjá HSN árin 2017 og 2018. Í kjölfarið starfaði hún í rúmt ár á bráðamóttöku Sjúkrahússins á Akureyri en hefur starfað hjá HSN á Akureyri frá árinu 2020.