Glæsilegt 285,6 fermetra einbýlishús við Grímshaga 8 í Vesturbæ Reykjavíkur er komið á sölu. Ásett verð er 330 milljónir króna. Núverandi eigandi er Guðmundur Hafsteinsson, fjárfestir, fyrrverandi yfirmaður hjá Google og stjórnarformaður Icelandair.

Húsið var reist árið 2017 og hefur verið endurnýjað með nútímalegum hætti. Á aðalhæð eru bjartar stofur, borðstofa, vel búið eldhús, þvottahús og gestasalerni. Úr stofu er gengið út á stóran sólpall sem snýr til suðurs.

Á efri hæð eru fimm svefnherbergi, þar á meðal hjónaherbergi með sérbaðherbergi, auk annars baðherbergis og þaksvala.

Við húsið er 48 fermetra bílskúr með gufubaði og innkeyrsla með plássi fyrir allt að sjö bíla. Í bakgarði er heitur pottur og skjólsælt útisvæði.

Með eigninni fylgir jafnframt rúmlega 50 fermetra aukaíbúð með sérinngangi sem getur meðal annars nýst til útleigu.