Noregur upplifiði hlýjasta vor frá upphafi mælinga árið 1901, samkvæmt upplýsingum frá norsku veðurstofunni sem birtar voru í dag. Meðalhiti á vormánuðum mældist 2,1 gráðu yfir meðallagi árstíðarinnar.

Þrátt fyrir að Noregur hafi sloppið að mestu við hitabylgjur sem gengu yfir víða í Evrópu í maí, skiluðu óvenju hlýir mars- og aprílmánuðir sér í metvorinu. Fyrra hitamet var sett árið 2024 þegar meðalhiti var 1,8 gráðum yfir meðallagi.

Hlýnunin var sérstaklega áberandi í norðurhluta landsins. Á Svalbarða, eyjaklasa milli meginlands Noregs og Norðurpólsins, mældist hitinn sums staðar fimm til sex gráðum yfir meðallagi í apríl.

Jostein Mamen loftslagsfræðingur hjá norsku veðurstofunni sagði þróunina skýrt tengjast loftslagsbreytingum af mannavöldum.

Norðurslóðir hitna hraðar en önnur svæði heimsins vegna svokallaðrar norðurslóðaaukningar, þar sem ís og snjór bráðna og gefa eftir dökkari yfirborð sjávar sem dregur í sig meiri hita.

Sameinuðu þjóðirnar hafa varað við því að meðalhiti jarðar verði áfram við eða nálægt methæðum næstu fimm árin. Hækkandi hitastig eykur meðal annars hættu á hitabylgjum, þurrkum og öfgafullum veðuratburðum á borð við flóð.