Kona í Kaliforníu hefur vakið mikla reiði á samfélagsmiðlum eftir að myndband náðist af henni þar sem hún reyndi að stöðva myndatöku við bónorð og lét rasísk ummæli falla í garð fólksins á staðnum.
Atvikið átti sér stað 2. október þegar ljósmyndarar og tökulið voru að mynda bónorð latnesks pars í almenningsgarði. Bónorðið hafði verið undirbúið af mikilli natni en rósablöðum hafði verið raðað þannig að þau mynduðu spurninguna „Viltu giftast mér?“ Þá lék mariachi hljómsveit fyrir parið.
Trinity Lugo, myndbandstökukona hjá Trinity Films, tók upp samskipti konunnar við tökuliðið. Myndbandið hefur síðan farið eins og eldur í sinu á samfélagsmiðlum og fengið hundruð þúsunda viðbragða.
Á upptökunni sést konan kvarta yfir því að garðurinn eigi að vera fyrir fólk sem búi á svæðinu og vilji njóta hans og halda þar lautarferðir. Þegar henni var sagt að tökunum lyki fljótlega sagðist hún vera orðin langþreytt á sambærilegum uppákomum um helgar.
Deilan varð síðan mun harðari. Konan krafðist þess að skreytingarnar yrðu teknar niður og sagðist hafa hringt á lögreglu. Að sögn Lugo hóf konan að láta rasísk ummæli falla eftir að mariachi hljómsveitin byrjaði að spila.
„Þetta er ekki Mexíkó,“ sagði konan meðal annars áður en hún beindi orðum sínum að parinu og hrópaði: „Farið aftur til Mexíkó.“
Lugo segir tökuliðið hafa verið slegið yfir framkomunni enda hafi það aðeins verið á staðnum til að festa bónorðið á filmu. Konan hafi hins vegar haldið sig á svæðinu um tíma og beðið eftir að lögregla kæmi.
Eftir að bónorðinu lauk segist Lugo hafa gengið að konunni ásamt öðrum úr tökuliðinu og sagt henni að rasísku ummælin hefðu náðst á myndband.
Að sögn Lugo hljóp konan þá á brott.
Myndbandið af atvikinu hefur vakið mikla athygli á Instagram þar sem hundruð þúsunda hafa brugðist við því.
