Tölvuþrjótar brutust inn í dönsku þjóðskrána og komust yfir persónuupplýsingar um milljónir einstaklinga. Danska ráðuneytið sem fer með stafræn málefni greindi frá þessu á mánudag.

Samkvæmt upplýsingum stjórnvalda fengu óviðkomandi aðilar ólöglegan aðgang að nöfnum, heimilisföngum og kennitölum um 8,8 milljóna einstaklinga. Þar á meðal eru einstaklingar sem eru látnir eða hafa flutt frá Danmörku.

Christina Egelund, ráðherra stafrænna málefna, segir atvikið afar alvarlegt. Danska ríkið vinni nú með viðeigandi yfirvöldum að því að kortleggja umfang gagnalekans og hvaða afleiðingar hann kunni að hafa.

Íbúar Danmerkur eru um sex milljónir en upplýsingar um samtals ellefu milljónir einstaklinga eru varðveittar í þjóðskránni. Þar eru meðal annars upplýsingar um fólk sem hefur látist og þá sem hafa flutt úr landi.

Rannsókn á tölvuárásinni er hafin en ekki liggur fyrir hverjir stóðu að baki henni.

Tölvuþrjótarnir komust ekki beint inn í kerfi þjóðskrárinnar heldur brutust inn hjá dönsku fyrirtæki sem hafði lögmætan aðgang að skránni. Stjórnvöld vinna nú að því að upplýsa nákvæmlega hvernig árásin var framkvæmd og hvaða gögn kunna að hafa verið misnotuð.