37 ára rakari í Lewisville í Texas kom lögreglu verulega á óvart þegar hann fann 128.514 Bandaríkjadali í reiðufé við hraðbanka og skilaði allri upphæðinni. Um er að ræða jafnvirði rúmlega 15 milljóna íslenskra króna.
Maðurinn, sem hefur óskað eftir nafnleynd, fann peningana ofan á hraðbanka Bank of America við West Main Street þann 3. ágúst. Þar var einnig minni poki sem innihélt 19 ávísanir.
Merkingar á einum pokanna urðu til þess að maðurinn taldi að peningarnir gætu tilheyrt nærliggjandi Chick-fil-A veitingastað. Hann ók því þangað en starfsmaður staðarins kannaðist ekkert við peningana.
Maðurinn hringdi þá í neyðarlínuna og lögreglumenn í Lewisville komu á vettvang og tóku peningana í sína vörslu. Kvittun í pokanum sýndi að þar ættu að vera 128.514 dalir. Lögreglumaður taldi peningana tvisvar og notaði einnig seðlatalningarvél til að staðfesta upphæðina. Ekki vantaði einn einasta dal.
Rannsókn leiddi síðar í ljós að peningarnir tilheyrðu Bank of America. Starfsmaður öryggisfyrirtækisins Brinks hafði fyrir mistök skilið pokann eftir ofan á hraðbankanum eftir að hafa sinnt þjónustu við vélina.
Lögregla fann ekkert sem benti til þess að peningarnir tengdust refsiverðri háttsemi og bankinn fékk þá að lokum afhenta.
Lögreglan í Lewisville hefur lýst yfir mikilli ánægju með heiðarleika mannsins og hyggst heiðra hann. Sjálfur hefur hann hvorki óskað eftir verðlaunum né opinberri athygli vegna málsins.
