Rúmlega 400 fermetra einbýlishús við Súluhöfða 27 í Mosfellsbæ hefur verið sett á sölu. Ásett verð eignarinnar er 295 milljónir króna en húsið var reist árið 2000.

Samkvæmt upplýsingum í fasteignaauglýsingu er húsið 401,6 fermetrar að stærð, þar af er bílskúr 40,5 fermetrar og með tíu herbergjum. Húsið er á tveimur hæðum og eru í dag þrjár íbúðir í því. Ein þeirra er 80,4 fermetra tveggja herbergja íbúð á jarðhæð með sérinngangi og sér fastanúmeri.

Á baklóðinni stendur jafnframt um 14,5 fermetra steypt hús þar sem komið hefur verið fyrir eldhúskrók, alrými og baðherbergi.

Á efri hæð aðalhússins er meðal annars rúmgott alrými með arinstofu og borðstofu. Þaðan er gengið út á suður- og vestursvalir. Eldhúsið er fyrir miðju hæðarinnar og opið að borðstofu. Þar eru einnig hjónaherbergi, tvö önnur svefnherbergi, baðherbergi og gestasnyrting.

Á neðri hæðinni eru stofa, svefnherbergi, baðherbergi, stórt þvottahús og geymsla. Þar er einnig bar og útgengt á verönd. Þá hefur verið útbúin stúdíóíbúð með sérinngangi í hluta hæðarinnar.

Bílskúrinn er flísalagður og búinn þriggja fasa rafmagni og rafhleðslu. Fyrir framan bílskúrinn og aðalinngang hússins er stórt upphitað bílaplan.

Við húsið eru rúmgóðir timburpallar og skjólgirðingar. Eignin stendur skammt frá golfvelli og stutt er í sundlaug og skóla.

Eigninni er lýst í auglýsingu sem vönduðu og vel byggðu húsi á góðum stað í Mosfellsbæ.