Tveir létust og 35 særðust í fjöldaskotárás sem átti sér stað í bænum Vienna í Georgíuríki í Bandaríkjunum aðfaranótt sunnudags. Lögregla leitar nú að þeim sem bera ábyrgð á árásinni.

Skotárásin átti sér stað þegar götuhátíð stóð yfir í bænum. Að sögn rannsóknarlögreglu Georgíuríkis, GBI, voru lögreglumenn frá Dooly sýslu við eftirlit á svæðinu þegar þeir heyrðu skothríð og héldu þegar á vettvang.

Þegar lögreglumenn komu á staðinn blasti við umfangsmikill vettvangur. Tveir ungir menn, Ja’Quavion Aderious Jackson, 21 árs, og Macaleb Malik Jackson, 23 ára, fundust látnir á götunni. Báðir höfðu hlotið skotsár. Ekki hefur komið fram hvort mennirnir tveir voru skyldir.

Alls særðust 35 aðrir í skotárásinni. Þeir voru fluttir á sjúkrahús á svæðinu til aðhlynningar. Ástand þeirra er misalvarlegt og er sagt vera allt frá stöðugu yfir í lífshættulegt.

Yfirvöld hafa ekki upplýst um mögulegt tilefni árásarinnar og ekki liggur fyrir hversu margir skutu. Enginn hafði verið handtekinn vegna málsins þegar síðast fréttist og stendur leit að þeim sem bera ábyrgð á árásinni yfir.

Rannsókn málsins er í höndum GBI í samstarfi við lögregluyfirvöld á svæðinu.