Sex erlendar konur hafa verið sakfelldar í Héraðsdómi Reykjaness fyrir skjalafals eftir að hafa framvísað fölsuðum skilríkjum í Leifsstöð. Allar hlutu þær 30 daga fangelsisdóm en engin þeirra mætti fyrir dóminn og eru dvalarstaðir þeirra sagðir óþekktir.

Allir dómarnir voru birtir í gær.

Ein þeirra, kona á sextugsaldri, var dæmd fyrir að hafa í janúar á þessu ári framvísað fölsuðu dvalarleyfisskírteini á eigin nafni í Leifsstöð.

Þrjár aðrar konur, á tvítugs-, þrítugs- og fertugsaldri, voru sakfelldar fyrir að hafa í desember á síðasta ári framvísað fölsuðum vegabréfum á öðrum nöfnum en sínum eigin. Allar voru þær stöðvaðar sama dag í Leifsstöð.

Tvær aðrar konur voru einnig dæmdar fyrir sambærileg brot eftir að hafa framvísað fölsuðum vegabréfum í Leifsstöð. Önnur þeirra er um sextugt en hin um fertugt. Þær voru báðar stöðvaðar sama dag og við sama hlið í flugstöðinni.

Í öllum sex dómunum kemur fram að dvalarstaðir kvennanna séu óþekktir.