Séra Arnaldur Arnold Bárðarson hefur verið ráðinn prestur í Árborgarprestakalli og tekur hann við starfinu 1. ágúst næstkomandi. Hann hefur víðtæka reynslu af prestsþjónustu bæði hér á landi og erlendis.

Þetta kemur fram í tilkynningu frá Þjóðkirkjunni.

Arnaldur fæddist á Akureyri árið 1966. Hann lauk guðfræðinámi frá Háskóla Íslands árið 1995 og var vígður til prestsþjónustu árið eftir í Raufarhafnarprestakalli. Á starfsferli sínum hefur hann meðal annars þjónað sem prestur á Hálsi í Fnjóskadal og við Glerárkirkju á Akureyri.

Árið 2010 hóf hann störf hjá norsku kirkjunni þar sem hann starfaði um sjö ára skeið. Eftir heimkomu til Íslands árið 2017 tók hann við embætti sóknarprests í Eyrarbakkaprestakalli og starfaði jafnframt í Þorlákshöfn um tíma. Síðar varð hann prestur í Árborgarprestakalli þegar það var stofnað.

Frá ársbyrjun 2023 hefur Arnaldur gegnt prestsþjónustu í Austfjarðaprestakalli og búið á prestssetrinu Heydölum í Breiðdal.

Eiginkona hans er sr. Ingibjörg Jóhannsdóttir, sem einnig hefur starfað innan kirkjunnar bæði á Íslandi og í Noregi. Hún er menntuð sem sérkennari og hefur undanfarin ár sinnt starfi djákna í Austfjarðaprestakalli.

Þau hjón eiga fimm syni og ellefu barnabörn.