Tveir Border Collie-hundar sem gengu lausir við Reynisvatn í Grafarholti réðust á fólk um helgina og hafa að minnsta kosti tveir einstaklingar leitað á slysadeild vegna meiðsla sem þeir hlutu en Vísir greindi fyrst frá málinu.
Málið er nú komið til skoðunar hjá Matvælastofnun og lögregla var kölluð á vettvang á laugardag vegna hundanna.
Í kjölfar umfjöllunar um árásirnar hafa fleiri einstaklingar stigið fram og greint frá sambærilegum atvikum tengdum sömu hundum. Margir hafa lýst yfir áhyggjum af hegðun hundanna og telja sumir að eigandi þeirra ráði ekki nægilega vel við að halda þeim í skefjum.
Einn maður, sem vildi ekki láta nafns síns getið, sagði við Vísi að hann hefði lent í árás hundanna fyrir um þremur vikum þegar hann var á göngu með eigin hund við Reynisvatn.
„Við gengum fram á tvær konur með þrjá Border Collie-hunda. Þeir reyndust mjög æstir og réðust strax á litla hundinn minn og bitu hann til blóðs. Ég tók hundinn minn strax í fangið og konurnar komu böndum á hundana og ég fékk því til leiðar komið að við gengum í gagnstæðar áttir,“ sagði maðurinn.
Katrín Árnadóttir varð einnig fyrir árás hundanna á laugardag þegar hún var að hlaupa í kringum Reynisvatn um miðjan dag.
„Mig grunar að ég hafi verið bitin fyrst, ég var að byrja þarna að hlaupa hringinn og sé þessa konu vera með hundana að baða sig þegar þeir vaða að mér rennandi blautir og einn þeirra bítur mig í kálfann,“ segir Katrín í samtali við blaðamann Vísis.
Sömu hundar bitu hlaupara í Árbæ
Talið er að um sömu hunda sé að ræða og réðust á Daníel Sigurbjartsson við Rauðavatn.
„Ég hleyp í kringum Rauðavatn nokkrum sinnum í viku og hef gert lengi. Í dag lenti ég í ótrúlegu atviki þegar þrír hundar réðust á mig og einn þeirra beit hressilega í kálfann á mér, svo ég þurfti að eyða nokkrum tímum á slysó. Eigandinn réð ekkert við þá og stóð bara hjá aðgerðarlaus. Allt við þessa uppákomu var eigandanum gjörsamlega til skammar,“ skrifar Daníel um málið.
Elísabet Helga Erlendsdóttir skrifaði svo í athugasemd að hún kannist við slíka hegðun við Rauðavatn.
„Ég lenti i svipuðu atviki um síðustu helgi þar sem hundur réðst á mig upp við vatnið og eigandinn gerði ekkert kippti sér ekki einu sinni upp við þegar við kölluðum að henni að hann hefði bitið mig. Það var svartur hundur sem ég var ekki alveg greint tegundina en hún var svo með fleiri hunda með sér,“ skrifar Elísabet og spyr svo að lokum hvað sé hægt að gera í svona aðstæðum.
