Daníel Freyr Sigurbjargarson er allt annað en sáttur við hegðun hundaeiganda við Rauðavatn en í færslu á Facebook-síðu Árbæjar greinir hann frá því að hann hafi verið bitinn í gær við vatnið.

„Ég hleyp í kringum Rauðavatn nokkrum sinnum í viku og hef gert lengi. Í dag lenti ég í ótrúlegu atviki þegar þrír hundar réðust á mig og einn þeirra beit hressilega í kálfann á mér, svo ég þurfti að eyða nokkrum tímum á slysó. Eigandinn réð ekkert við þá og stóð bara hjá aðgerðarlaus. Allt við þessa uppákomu var eigandanum gjörsamlega til skammar,“ skrifar Daníel um málið.

„Hundarnir, þá sérstaklega þessi sem beit, héldu áfram að ógna mér þegar skógarhöggsmenn frá borginni áttu leið hjá á besta tíma og ég gat hoppað upp í bílinn þeirra og leitað skjóls.

Þetta var ofboðslega súrt atvik og ég hreinlega þakka fyrir að hafa ekki verið að rölta með barnið mitt. Lausir hundar eru EKKI leyfðir við vatnið. Þetta er því miður alls ekki í fyrsta sinn sem hundar koma hlaupandi og geltandi að manni við vatnið,“ skrifar hann að lokum.

Þá bætir hann við í athugasemd að eigandinn hafi gert lítið úr málinu þar sem hundurinn væri aðeins hálfs árs gamall.

Fleiri lent í svipuðu

Elísabet Helga Erlendsdóttir skrifaði svo í athugasemd að hún kannist við slíka hegðun við Rauðavatn.

„Ég lenti i svipuðu atviki um síðustu helgi þar sem hundur réðst á mig upp við vatnið og eigandinn gerði ekkert kippti sér ekki einu sinni upp við þegar við kölluðum að henni að hann hefði bitið mig. Það var svartur hundur sem ég var ekki alveg greint tegundina en hún var svo með fleiri hunda með sér,“ skrifar Elísabet og spyr svo að lokum hvað sé hægt að gera í svona aðstæðum.

Ekki er þetta í fyrsta skipti sem kvartað er undan hundaeigendum við Rauðavatn en staðurinn hefur verið gífurlega vinsæll meðal þeirra undanfarna áratugi.