Frægasti hrafn Íslands, Dimma, sem hafði verið týnd í um viku hefur nú verið fundin í Rauðavatnsskógi.

Jóhann Helgi Hlöðversson, stjúpfaðir Dimmu, skrifaði færslu í gærkvöldi þar sem hann segir frá því að nokkrar vísbendingar hafi borist honum um að Dimma væri á lífi og að hann hefði fengið myndir af henni í Rauðavatnsskógi.

„Ég er búin að fá nokkrar vísbendingar um að Dimma sé á lífi og séð myndir af henni í Rauðavatnsskógi við Rauðavatn á Norðlingaholti. Við Magga leituðum þar í morgun en fundum hana ekki.“

Jóhann Helgi segir að þau hjónin ætli að leita betur að Dimmu í dag og biður fólkið sem séð hefur hana í skóginum að segja nánar frá staðsetningunni í einkaskilaboðum.

„Þau ykkar sem hafið séð hana þar, gætuð þið sent á mig í einkaskilaboðum nánari lýsingu hvar í skóginum hún hélt sig? Við ætlum að leita betur á morgun... ps hér eru myndirnar sem náðust af henni. Hún þekkist á því að vinstri vængurinn sígur neðar en hinn þegar hún situr.“

Dimma fundin

Rétt upp úr klukkan 13:00 í dag birti Jóhann Helgi þær gleðifréttir á Facebook að Dimma væri fundin heil heilsu, eftir vísbendingar frá „góðum Dimmuvinum“:

„Allt er gott sem endar vel. Við fundum Dimmu í Rauðavatnsskógi og takk fyrir vísbendingar frá góðum Dimmuvinum ...“

Fréttin hefur verið uppfærð