Mexíkóska samfélagsmiðlastjarnan Paola Márquez er látin, aðeins 30 ára að aldri. Márquez naut mikilla vinsælda á samfélagsmiðlum og hafði á að skipa yfir tveimur milljónum fylgjenda á TikTok, Instagram og Facebook.

Samkvæmt erlendum miðlum fannst Márquez meðvitundarlaus á heimili sínu í borginni San Luis Potosí í Mexíkó á laugardag. Neyðarviðbragðsaðilar voru kallaðir á vettvang en hún var úrskurðuð látin við komuna. Yfirvöld í Mexíkó rannsaka nú andlát hennar.

Faðir hennar, Hércules Márquez Balderas, staðfesti andlátið í tilfinningaþrunginni færslu á samfélagsmiðlum þar sem hann kvaddi dóttur sína með orðunum: „Hvíldu í friði prinsessan mín.“ Útför og minningarathöfn til heiðurs Márquez fór fram á mánudag.

Paola Márquez varð þekkt fyrir efni tengt lífsstíl, ferðalögum og daglegu lífi sínu. Hún byggði upp stóran og tryggan hóp fylgjenda sem fylgdist náið með efni hennar á samfélagsmiðlum.

Frá því fregnir bárust af andláti hennar hafa fjölmargir aðdáendur sent samúðarkveðjur og minningarorð á samfélagsmiðlasíður hennar. Þá hafa margir einnig rifjað upp síðustu færslur hennar á netinu í ljósi fregnanna