Skosk kona, 46 ára að aldri, lést eftir að hafa fengið hjartaáfall skömmu eftir komuna til Lanzarote þar sem hún ætlaði að verja fríi með fjölskyldu sinni.

Greint er frá þessu í spænskum fjölmiðlum.

Konan, sem hét Mandi Murray og var frá Skotlandi, hafði nýlega komið til eyjunnar ásamt fjölskyldu sinni þegar hún veiktist alvarlega fimmtudaginn 28. maí.

Andlát hennar hefur vakið mikla samúð meðal vina, ættingja og fólks í nærumhverfi fjölskyldunnar. Dóttir hennar hefur sett af stað söfnun á GoFundMe til að styðja föður sinn, Derek Murray, á þessum erfiða tíma.

Á örfáum klukkustundum höfðu meira en 1.780 pund safnast og hefur upphæðin nú farið yfir 5.000 pund.

Steven Murray, sonur hinnar látnu, minntist móður sinnar í færslu á samfélagsmiðlum þar sem hann lýsti henni sem bæði einum mesta gagnrýnanda sínum og einum besta vini sínum.

Hann sagði hana hafa verið einstaklega fjölskyldukæra og ávallt tilbúna að gera hvað sem væri fyrir þá sem henni þótti vænt um. Þá sagði hann hana hafa verið tryggan vin sem hefði verið þekkt fyrir að segja skoðun sína hispurslaust.