Fjórir slösuðust í bjarnarárás í borginni Fukushima í norðurhluta Japans í dag þegar björn réðst inn á tvær verksmiðjur og inn í íbúðahverfi. Þetta kemur fram í tilkynningu frá lögreglu og japönskum fjölmiðlum.

Samkvæmt upplýsingum lögreglu hófst atvikið þegar björn sást inni í verksmiðju sem framleiðir bílavarahluti. Neyðarsímtal barst þar sem tilkynnt var að starfsmenn hefðu orðið fyrir árás dýrsins.

Björnin hélt síðan áfram um svæðið og særði tvo aðra einstaklinga, annan í íbúðahverfi og hinn á lóð rafeindatækjaframleiðanda í nágrenninu. Talið er að björninn hafi síðar haldið sig inni í verksmiðjunni.

Japanski fjölmiðillinn Yomiuri Shimbun greinir frá því að einn hinna slösuðu hafi hlotið alvarlega áverka en aðrir hafi sloppið með minni meiðsli.

Á síðasta ári létust 13 manns í bjarnarárásum í Japan og hafa birnir ítrekað sést nærri skólum, heimilum og verslunarsvæðum. Í apríl á þessu ári lést einn maður og fimm slösuðust í árásum bjarna samkvæmt japanska umhverfisráðuneytinu.