Grænfáninn efnir til spennandi ráðstefnu þann 2. október næstkomandi í Hlégarði í Mosfellsbæ, þar sem sjónum verður beint að útikennslu og vellíðan í skólastarfi. Ráðstefnan kemur á mikilvægum tímapunkti en ný skýrsla heilbrigðisráðuneytisins sýnir vaxandi lýðheilsuáskoranir og versnandi andlega líðan meðal barna og ungmenna á Íslandi.
Skráningarfrestur á ráðstefnuna er til og með mánudeginum 28. september, að því er fram kemur í fréttatilkynningu frá Landvernd.
Hvað er Grænfáninn?
Grænfáninn er alþjóðleg viðurkenning fyrir skóla sem vinna markvisst að umhverfismálum og menntun til sjálfbærni. Um er að ræða stærsta umhverfismenntaverkefni í heimi og hafa Sameinuðu þjóðirnar útnefnt Grænfánann sem helsta innleiðingartæki menntunar til sjálfbærni á heimsvísu.
Útikennsla sem forvörn og svar við lýðheilsuvanda
Rannsóknir sýna bein tengsl útiveru við aukna andlega vellíðan og einbeitingu nemenda. Með því að færa kennslustofuna út í náttúruna fá nemendur dýpri skilning á lífbreytileika og skapa sterka tengingu við náttúruna, sem er lykillinn að því að ýta undir umhverfisvitund.Í ljósi nýrrar skýrslu heilbrigðisráðuneytisins – þar sem fram kemur að andlegri líðan barna hafi hrakað á undanförnum áratugum og að hreyfingu og mataræði sé ábótavant – getur útikennsla nýst sem mikilvægt tæki í forvörnum og aðgerðum. Hún ýtir undir fjölbreytta kennslu, hreyfingu og vitneskju um heilbrigða lifnaðarhætti.
Öflugir fyrirlesarar á dagskrá
Á dagskrá ráðstefnunnar eru fróðleg lykilerindi og líflegar vinnustofur um tengsl útikennslu við vellíðan, lífbreytileika og náttúrutengingu:
- Staðartengd útimenntun og vísindalæsi – Edda Elísabet Magnúsdóttir, lektor í kennslu náttúruvísinda við Menntavísindasvið Háskóla Íslands og PhD í líffræði.
- Bækurnar um Sóley og Fífu: Innblástur fyrir fræðslu, góð samskipti og leik í náttúrunni – Þorbjörg Sandra Bakke, teymisstjóri hringrásarhagkerfisins hjá Orku- og umhverfisstofnun og rithöfundur.
- Áhrif umhverfis á heilsu – Kristín Sigurðardóttir, slysa- og bráðalæknir og kennari við Háskóla Íslands og Háskóla Reykjavíkur.
Að erindunum loknum standa þátttakendum til boða fjölbreyttar vinnustofur fyrir mismunandi skólastig ásamt menntabúðum. Þar verður hægt að flakka á milli kynningabása og kynna sér meðal annars jóga fyrir börn, námsefni og dæmi um vel heppnuð verkefni.
Að sögn aðstandenda gefst hér kjörið tækifæri fyrir skólafólk, kennara og önnur áhugasöm til að viða að sér nýjustu þekkingu þegar kemur að útikennslu og vellíðan nemenda.
