Tveir karlmenn á þrítugsaldri hafa verið ákærðir fyrir sérstaklega hættulega líkamsárás sem átti sér stað í miðbæ Vopnafjarðar sumarið 2024. Frá þessu segir Austurfrétt.

Samkvæmt ákæru sparkaði annar mannanna í höfuð fórnarlambsins með þeim afleiðingum að það missti meðvitund. Hinn maðurinn er sakaður um að hafa í kjölfarið sparkað ítrekað í líkama þess þar sem það lá meðvitundarlaust og ófært um að verja sig.

Fórnarlambið hlaut meðal annars heilahristing, áverka og bólgur á vör auk tannskemmda.

Árásin átti sér stað á bílastæði fyrir framan Kaupvang sömu helgi og bæjarhátíðin Vopnaskak fór fram.

Mönnunum er gefið að sök brot gegn 218. grein almennra hegningarlaga, sem tekur til líkamsárása sem teljast sérstaklega hættulegar vegna þeirrar aðferðar sem beitt er. Slík brot geta varðað nokkurra ára fangelsi.

Fórnarlambið krefst tæplega 2,2 milljóna króna í skaðabætur og miskabætur.