Stjórnvöld í Íran vara við mögulegum orkuskorti í vetur eftir að árásir Bandaríkjanna og Ísraels á orkumannvirki landsins drógu úr gasframleiðslugetu.

Talskona írönsku ríkisstjórnarinnar, Fatemeh Mohajerani, segir árásirnar á orkugeirann hafa kostað landið um 230 milljónir rúmmetra í framleiðslugetu, að því er ríkisfjölmiðillinn IRIN greinir frá.

Aðspurð um gasbirgðir þegar kaldari árstími gengur í garð sagði Mohajerani að unnið væri að því að endurheimta um 100 milljónir rúmmetra af þeirri framleiðslugetu sem tapast hefur.

Hún sagði árásir Bandaríkjanna og Ísraels hafa bæst ofan á þann ójafnvægi sem þegar var til staðar í orkuframboði þegar ríkisstjórnin tók við. Stjórnvöld hefðu tekist á við vandann í nokkur árstíðaskipti, bæði vetur og sumar, með aðstoð almennings.

Vara við vandræðum í norðurhlutanum

Mohajerani segir því líklegt að íbúar í norðurhluta Írans verði fyrir áhrifum í vetur.

„Miðað við þróun undanfarinna ára munum við líklega eiga í vandræðum í norðurhéruðunum,“ sagði hún.

Hún bætti við að innanríkisráðuneytið hefði varað landshöfðingja við stöðunni og gripið hefði verið til ráðstafana til að tryggja að daglegt líf fólks raskaðist sem minnst.

Stjórnvöld hyggjast jafnframt reyna, í gegnum æðsta orkuráð landsins, að halda iðnaði gangandi á sama tíma og tryggt verði að heimili landsmanna verði ekki fyrir verulegum áhrifum.

Mohajerani sagðist vona að Íranir kæmust í gegnum veturinn með „sem minnstum rafmagnstruflunum og sem minnstum vandamálum“.