Kát Ína kanína — og leyndarmálið er ný barnabók eftir Láru Garðarsdóttur fyrir börn á aldrinum þriggja til sjö ára. Lára skrifar, myndskreytir og gefur bókina út sjálf og fjallar þar um mikilvægt en viðkvæmt efni: muninn á góðum og vondum leyndarmálum.

Sagan segir frá kanínunni Ínu sem gengur með leyndarmál sem verður sífellt þyngra að bera. Í gegnum söguna er börnum á einfaldan hátt bent á að það sé mikilvægt að segja frá ef leyndarmál veldur vanlíðan, ótta eða skömm.

Hvað varð til þess að þú skrifaðir bókina?

„Við þekkjum öll góð leyndarmál,“ segir Lára í samtali við Mannlíf. „Að mamma sé ólétt, hvað einhver fær í jólagjöf eða hver er skotinn í hverjum. Slík leyndarmál geta verið skemmtileg og skapað spennu, gleði og samkennd.“

En svo eru leyndarmál sem eru allt annars eðlis.

„Það eru leyndarmál sem valda vanlíðan, skömm eða ótta. Börn eru háð fullorðnum og geta átt sérstaklega erfitt með að segja frá þegar tryggðin við fólkið í kringum þau verður til þess að þau þegja.“

Lára segir að ein helsta ástæða þess að hún hafi viljað skrifa bókina hafi verið að kenna börnum að „svíkja ekki sig sjálf“.

„Ég vildi gefa þeim glugga til að greina á milli leyndarmála og vandamála. Ég var sjálf barn með leyndarmál og kannski skrifa ég þessa sögu að einhverju leyti fyrir litlu Láru – sem hefði alveg mátt vita að hún má og á að segja frá þegar henni líður illa.“

Vandað til verka

Lára segir mikilvægt hafa verið að fara varlega með efnið, enda bókin ætluð mjög ungum börnum.

„Ég leitaði meðal annars til starfsfólks Barnahúss, kennara og heilbrigðisstarfsfólks við vinnslu bókarinnar. Mér fannst mikilvægt að nálgast þetta á réttan hátt.“

Markmiðið hafi þó aldrei verið að skrifa þunga eða íþyngjandi bók.

„Ég vildi skrifa sögu sem börn geta notið og samsamað sig með, en sem getur líka gefið foreldrum og öðrum fullorðnum tækifæri til að opna á samtal.“

Sagan er í bundnu máli og bókin rík af myndmáli, en Lára myndskreytir bókina sjálf og segir það hafa verið mikilvægan hluta af sköpunarferlinu.

Hefur opnað samtöl

Viðbrögðin eftir að bókin kom út hafa verið Láru sérstaklega dýrmæt.

„Börn hafa sjálf talað um að Ína hafi verið leið vegna leyndarmálsins og fullorðnir hafa sagt mér frá samtölum sem hafa skapast eftir lesturinn.“

Þannig hafi bókin ekki aðeins snert börnin.

„Hún hefur ekki síður haft áhrif á og hreyft við fullorðna fólkinu. Það er í raun nákvæmlega það sem ég vonaði að bókin gæti gert.“

Lára segist ekki gera ráð fyrir að ein barnabók geti leyst erfið mál.

„En ef hún getur hjálpað einu barni að finna orð yfir eitthvað sem því líður illa með, eða orðið tilefni til samtals sem annars hefði ekki átt sér stað, þá hefur hún gert það sem ég vonaði að hún gæti gert.“

Gefur bókina út sjálf

Lára hefur skrifað og myndskreytt barnabækur um árabil og áður gefið út bókina Flökkusögu, sem seldist upp.

Kát Ína kanína — og leyndarmálið hlaut styrk úr Höfundasjóði Myndstefs en Lára sér sjálf um útgáfu bókarinnar og hún er nú komin í almenna dreifingu hjá Pennanum, Bókabúð Forlagsins og A4, auk þess sem hægt er að kaupa hana á heimasíðu hennar.

Útgáfuhóf verður haldið í Pennanum Eymundsson í Kringlunni 11. október klukkan 14. Allir eru velkomnir.