Flugi Ryanair frá Manchester til Tenerife var beint til Lissabon í Portúgal á fimmtudagskvöld eftir að hópur farþega olli ólátum um borð. Farþegi í vélinni segir nokkrar konur hafa verið fjarlægðar úr flugvélinni af lögreglu eftir lendingu.

Flugið fór frá Manchester klukkan 20:30 að staðartíma á fimmtudag og var förinni heitið til Tenerife. Áður en vélin komst til Kanaríeyja var hins vegar ákveðið að lenda í Lissabon vegna ástandsins um borð.

Canarian Weekly hefur eftir farþega að hópur kvenna hafi virst vera ölvaður og valdið verulegri truflun meðan á fluginu stóð. Lögregla hafi komið um borð eftir lendingu og fjarlægt sex eða sjö konur úr vélinni.

Ekki liggur fyrir staðfesting portúgalskra yfirvalda á nákvæmum fjölda þeirra sem voru fjarlægðir eða hvort einhverjar þeirra hafi verið handteknar.

Ferðalaginu lauk þó ekki þar. Samkvæmt farþeganum tilkynnti Ryanair í kjölfarið að áhöfn vélarinnar hefði ekki lengur heimild til að halda fluginu áfram vegna reglna um hámarksstarfstíma áhafna.

Farþegarnir þurftu því að bíða í Lissabon þar til hægt var að halda ferðinni áfram á föstudagsmorgun.