Lögreglumaður í Shelby í Norður-Karólínu hefur verið rekinn úr starfi eftir að myndbandsupptaka úr dyrabjöllumyndavél sýndi harkalega handtöku konu sem hefur vakið mikla reiði í samfélaginu.
Á upptökunni sést lögreglumaður glíma við konu fyrir utan íbúðarhús áður en hann tekur hana niður á jörðina og virðist slá hana ítrekað meðan á átökunum stendur. Myndbandið hefur farið hratt í dreifingu á samfélagsmiðlum og leitt til mótmæla og krafna um svör frá lögregluyfirvöldum.
Konan heyrist á upptökunni spyrja hvers vegna verið sé að handtaka hana og segir engan handtökuskipun liggja fyrir. Skömmu síðar byrjar lögreglumaðurinn að kýla hana í andlitið. Samkvæmt dómskjölum hefur lögreglumaðurinn verið nafngreindur sem Karson Hyder.
Annar lögreglumaður sést síðar grípa inn í og draga Hyder frá konunni á meðan hann segir: „Ég er með hana,“ áður en handtakan heldur áfram.
Óljóst er hvað gerðist áður en upptakan hófst þar sem öryggismyndavélin fór ekki í gang fyrr en hreyfiskynjari hennar virkjaðist.
Lögreglustjórinn í Shelby, Brad Fraser, staðfesti í yfirlýsingu að Hyder hefði verið rekinn. Hann sagði framgöngu lögreglumannsins ekki samræmast verklagi eða gildum embættisins og viðurkenndi jafnframt að málið hefði skaðað traust almennings til lögreglunnar.
Atvikið hefur síðan leitt til mótmæla í Shelby þar sem íbúar hafa krafist skýringa á valdbeitingunni við handtökuna.
