Jón Arnór Stefánsson, einn besti körfuboltamaður í sögu Íslands, er ekki lengur starfsmaður Fossa fjárfestingarbanka.

Þetta kemur fram í tilkynningu frá bankanum en ekkert er gefið upp um af hverju hann hefur látið af störfum.

„Steingrímur Arnar Finnsson, forstjóri Fossa fjárfestingarbanka, mun veita einkabankaþjónustu Fossa forystu næstu misserin samhliða starfi sínu sem forstjóri. Eignastýring fyrir viðskiptavini Fossa hefur um nokkurt skeið verið í höndum Íslenskra verðbréfa og mun Hreggviður Ingason, fjárfestingastjóri hjá Íslenskum verðbréfum, koma tímabundið að þjónustu við viðskiptavini bankans ásamt Steingrími og Erni Jónssyni,“ segir í tilkynningunni.

„Óttar Helgason og Jón Arnór Stefánsson, viðskiptastjórar einkabanka, hafa látið af störfum,“ en athygli vekur að þeim var ekki þakkað fyrir störf sín hjá bankanum.

Jón var ráðinn til starfa í ársbyrjun 2022 en hann kom til fyrirtækisins frá BDA Sports Management.

Fáir hafa náð jafn góðum árangri í körfubolta hérlendis og Jón Arnór en hann varð margfaldur Íslandsmeistari á ferlinum, var valinn besti körfuboltamaður ársins trekk í trekk og spilaði með Dallas Mavericks í NBA-deildinni en kom þó aldrei við sögu í NBA-leik.