Gosfélagið hefur ráðið Hrafn Davíðsson í stöðu framleiðslustjóra fyrirtækisins. Í starfi sínu mun Hrafn leiða uppsetningu nýrra framleiðslulína félagsins og í framhaldinu bera ábyrgð á skipulagningu og daglegri stýringu framleiðslu á vörulínum þess.
Hrafn býr yfir áratugar reynslu af CNC-framleiðslu, framleiðslustjórnun og ferlaumbótum. Hann hefur víðtæka þekkingu á birgðastjórnun, teymisstjórnun og innleiðingu Lean-aðferða.
„Við erum afar lánsöm að hafa fengið Hrafn til liðs við okkur í Gosfélaginu. Reynsla hans af framleiðsluferlum og stjórnun mun án efa styrkja starfsemi félagsins og styðja við þá uppbyggingu sem fram undan er,“ segir Brynjar Freyr Valsteinsson, framkvæmdastjóri Gosfélagsins.
Hrafn er með meistaragráðu í framleiðsluverkfræði og stjórnun frá Kungliga Tekniska Högskolan (KTH) í Svíþjóð og bakkalárgráðu í vélaverkfræði frá Boston University. Hann er jafnframt sérfræðingur í stefnumótun og skipulagi fyrirtækja. Undanfarin ár starfaði hann hjá Össuri þar sem hann bar ábyrgð á CNC-framleiðslu fyrirtækisins á Íslandi og á heimsvísu. Þá var Hrafn nokkuð góður knattspyrnumarkmaður á sínum tíma og lék meðal annars með Fylki, ÍBV og Fjölni. Þá lék hann einnig sjö leiki með yngri landsliðum Íslands.
„Það er afar spennandi að fá að taka þátt í uppbyggingu framleiðslu hjá Gosfélaginu. Félagið hefur metnaðarfull áform á dagvörumarkaði og ég hlakka til að takast á við þau verkefni og áskoranir sem fram undan eru,“ segir Hrafn.
