Umræða um sjálfsfróun og notkun kynlífstækja innan sambanda hefur verið nokkur að undanförnu og meðal annars hefur þeirri spurningu verið velt upp hvort slík iðkun geti talist framhjáhald. Eva Pandora Baldursdóttir, sambands- og kynlífsráðgjafi og fyrrum þingmaður Pírata, fjallar um málið í aðsendri grein á Vísi.
Eva segir ekki óeðlilegt að notkun maka á kynlífstækjum geti vakið upp ýmsar tilfinningar. Fólk geti fundið fyrir óöryggi, höfnun eða áhyggjum af því að vera ekki nóg fyrir maka sinn.
„Ef annar aðilinn notar kynlífstæki getur hinn upplifað það sem vísbendingu um að eitthvað vanti í kynlífið þeirra, að makinn sé ekki fullnægður eða jafnvel að tækið sé á einhvern hátt að taka yfir hlutverk sem honum finnst að hann eigi sjálfur að gegna,“ skrifar Eva.
Hún segir mikilvægt að greina á milli þess að finna fyrir óöryggi og þess að hegðun maka feli raunverulega í sér ógn við sambandið. Tilfinningarnar geti verið raunverulegar þótt túlkunin sem fylgi þeim sé ekki endilega rétt.
Eva segir sjálfsfróun fyrir marga vera eðlilegan hluta eigin kynverundar. Hún geti verið leið til að slaka á, kynnast eigin líkama betur, fá útrás eða einfaldlega njóta kynferðislegrar vellíðunar. Það þurfi ekki að segja neitt neikvætt um kynferðislega löngun til maka.
„Kynlíf með sjálfum sér og kynlíf með maka uppfylla heldur ekki alltaf sömu þarfir. Annað þarf ekki að koma í stað hins,“ skrifar hún.
Þá hafnar Eva þeirri hugmynd að sjálfsfróun þurfi að draga úr kynferðislegum áhuga á maka. Hún segir kynferðislega virkni þvert á móti geta ýtt undir kynferðislegar hugsanir, löngun og áhuga á kynlífi almennt.
„Löngun er ekki eins og bensíntankur sem tæmist við notkun,“ skrifar Eva og líkir kynlöngun frekar við vöðva sem hitni og þjálfist við hreyfingu.
Hún hvetur fólk að lokum til þess að líta ekki á sjálfstæða kynverund maka síns sem samkeppni. Að vera í sambandi þýði ekki að fólk öðlist einkarétt á kynferðislegri ánægju hins aðilans.
„Kynverund maka okkar er ekki ógn sem þarf að halda í skefjum heldur heill heimur sem við getum fengið að kynnast,“ skrifar Eva og segir mögulega mun meira spennandi að fá boð inn í þann heim en að reyna að loka honum.
