Umræða hefur skapast innan Facebook-hópsins Beauty tips eftir að Þóra Marta Kristjánsdóttir vakti athygli á erfiðleikum langveikra og fatlaðra við að tryggja sér sæti á tónleikum Of Monsters and Men á Íslandi.

Þóra Marta sendi fyrirspurn á hljómsveitina Of Monsters and Men eftir að hún sá að miðar á komandi tónleika þeirra væru ónúmeraðir, sem jafnan þýðir að um standandi tónleika sé að ræða. Í tölvupóstinum útskýrði hún stöðu sína:

„Ég er sjúklingur sem vonaði að það væru sæti. Ég held í vonina og vona að ég heyri frá ykkur,“ skrifaði Þóra, sem hlakkaði mikið til að sækja viðburðinn en hikaði vegna óvissunnar.

Sæti í boði en engin trygging

Svar barst frá miðasölunni Tix.is og kom fram að boðið yrði upp á stúku á tónleikunum þar sem hægt væri að setjast, en skipulagið yrði með þeim hætti að ekki væri hægt að koma til móts við sérstakar þarfir einstakra gesta:

„Þau sæti eru í raun fyrstir koma fyrstir fá og því ekki hægt að taka frá sæti fyrir neinn,“ sagði í svari miðasölunnar.

Gagnrýnir útilokun á menningarviðburðum

Þetta fyrirkomulag mælist illa fyrir og sýnir, að mati Þóru Mörtu, ákveðið aðgengis- og skilningsleysi gagnvart þeim sem glíma við skerta hreyfigetu eða langvarandi veikindi. Þar sem fólk þarf að mæta snemma og treysta á heppni til að fá sæti, standa margir sjúklingar frammi fyrir því að geta hreinlega ekki átt þess kost að mæta.

Þóra Marta birti skjáskot af tölvupóstsamskiptunum inni á Beauty tips og dró bitra en raunsæja ályktun af svörunum:

„Staðreynd: sumir tónleikar eru bara fyrir heilbrigða.“

Málið varpar ljósi á ákall margra um að viðburðahaldarar á Íslandi tryggi skýrari ferla og frátekinn svæði fyrir fólk sem líkamlega getur ekki staðið heilu tónleikana.