Lögreglustjórinn á Suðurnesjum hefur höfðað fjögur aðskilin sakamál vegna meintra brota sem tengjast meðal annars peningaþvætti, hylmingu og ólöglegri atvinnu. Málin verða tekin fyrir í Héraðsdómi Reykjaness 27. október næstkomandi.
Í einu málanna eru tveir menn ákærðir fyrir peningaþvætti. Samkvæmt ákæru er þeim gefið að sök að hafa á tímabilinu 28. febrúar til 5. mars á þessu ári tekið við samtals 12.140 evrum og 2.700 Bandaríkjadölum í reiðufé frá óþekktum aðila eða aðilum.
Mennirnir voru handteknir í Flugstöð Leifs Eiríkssonar 5. mars þegar þeir voru á leið til Helsinki í Finnlandi. Annar þeirra var samkvæmt ákæru með 6.000 evrur og 2.700 Bandaríkjadali falda í farangri sínum en hinn með 6.140 evrur.
Ákæruvaldið telur að mönnunum hafi ekki getað dulist að peningarnir væru ávinningur af refsiverðum brotum.
Í öðru máli er maður ákærður fyrir peningaþvætti og brot gegn lögum um atvinnuréttindi útlendinga. Honum er gefið að sök að hafa um nokkurt skeið, allt til 4. júní 2025, unnið án atvinnuréttinda á hóteli og þá í nafni annars manns.
Þá er hann ákærður fyrir að hafa tekið við 4.760 evrum í reiðufé sem ákæruvaldið telur ávinning af refsiverðum brotum. Peningarnir fundust í fórum hans þegar hann var handtekinn í Leifsstöð á leið til Mílanó á Ítalíu.
Þriðja málið varðar mann sem er ákærður fyrir peningaþvætti vegna 5.175 evra í reiðufé. Samkvæmt ákæru tók hann við peningunum á tímabilinu 9. til 18. maí síðastliðinn. Hann var handtekinn í Flugstöð Leifs Eiríkssonar 18. maí þegar hann var á leið til Amsterdam í Hollandi.
Í fjórða málinu er maður ákærður fyrir peningaþvætti og hylmingu. Honum er gefið að sök að hafa tekið við 1.810.000 krónum í reiðufé frá óþekktum aðila eða aðilum. Hann var handtekinn í Leifsstöð 5. febrúar á leið til Gdansk í Póllandi.
Við handtökuna var maðurinn jafnframt með ýmsan varning í ferðatösku sinni, meðal annars fatnað, leikföng, matvöru, snyrtivörur og fæðubótarefni. Samkvæmt ákæru var um stolna muni að ræða og honum hafi ekki getað dulist að varningurinn væri þýfi.
Ákæruvaldið krefst refsingar og greiðslu sakarkostnaðar í málunum. Jafnframt er krafist upptöku þeirra fjármuna sem lögregla lagði hald á og, í síðastnefnda málinu, þeirra muna sem taldir eru vera þýfi.
