Umræða skapaðist innan Facebook-hópsins Beauty tips eftir að Þóra Marta Kristjánsdóttir vakti athygli á erfiðleikum sumra við að tryggja sér sæti á tónleikum Of Monsters and Men í Kaplakrika. Hljómsveitin og tónleikahaldarar harma þær upplýsingar sem miðasalan veitti og árétta að unnið sé að því að tryggja aðgengi fyrir öll.

Óvissan hófst þegar Þóra Marta sendi fyrirspurn vegna tónleikanna þar sem miðar voru ónúmeraðir, en hún vonaðist til þess að hægt yrði að tryggja sæti fyrir fólk með skerta hreyfigetu. Svarið sem hún fékk frá miðasölunni Tix.is olli henni miklum vonbrigðum. Þar kom fram að stúkusæti yrðu í boði á meginreglunni „fyrstir koma, fyrstir fá“ og ekki væri hægt að taka frá sæti fyrir neinn. Þóra Marta birti skjáskot af samskiptunum á samfélagsmiðlum og dró þá ályktun að sumir tónleikar væru einfaldlega „bara fyrir heilbrigða.“.

Svör miðasölunnar endurspegla ekki áherslur hljómsveitarinnar

Hljómsveitin Of Monsters and Men og tónleikahaldarar hafa nú sent frá sér yfirlýsingu þar sem þeir leiðrétta þann misskilning sem þessi svör sköpuðu. Þeir taka skýrt fram að svör miðasölunnar endurspegli ekki það fyrirkomulag sem unnið sé eftir.

„Frá upphafi höfum við lagt mikla áherslu á að tónleikarnir séu aðgengilegir og að allir gestir geti notið þeirra við sem bestar aðstæður, enda mikil spenna hjá meðlimum sveitarinnar að enda alheimstónleikaferð á Íslandi,“ segir í svari hljómsveitarinnar.

Þá kemur fram að hljómsveitinni hafi ekki verið kunnugt um erindi Þóru Mörtu fyrr en málið kom upp á samfélagsmiðlum en hún fagni öllum erindum. Nú þegar sé byrjað að aðstoða fólk sem hefur lýst eftir sérstökum þörfum.

„Nú þegar hafa gestir sett sig í samband við okkur vegna sérstakra þarfa og höfum við unnið með hverjum og einum að því að tryggja viðeigandi aðstöðu bæði í gegnum Tix sem og í eigin persónu.“

Hvetja fólk til að hafa samband

Aðstandendur tónleikanna segja markmið sitt einfalt: að allir sem vilja njóta heimkomutónleikanna geti gert það á sem bestan máta. Þeir harma þá óþarfa óvissu sem stöðluð svör Tix.is kynnu að hafa valdið og hvetja alla þá sem þurfa sérstaka aðstoð eða aðstöðu að láta vita af sér.

„Við hvetjum alla gesti sem telja sig þurfa sérstaka aðstöðu eða aðstoð til að hafa samband við Tix eða tónleikahaldara. Við munum leggja okkur áfram fram um að finna lausn og tryggja að allir geti notið frábærra tónleika við sem bestar aðstæður og átt ógleymanlegt kvöld með okkur í Kaplakrika.“