Atli Sveinn Þórarinsson, fyrrverandi landsliðsmaður í knattspyrnu, og Jóhann Már Kristinsson hafa stofnað einkahlutafélagið Himnasmið ehf.

Atli Sveinn er skráður stjórnarmaður félagsins en Jóhann Már er varamaður í stjórn og jafnframt framkvæmdastjóri.

Tilgangur Himnasmiðs er meðal annars útgáfa bóka og veggspjalda auk hugbúnaðargerðar, meðal annars fyrir menntastofnanir og íþróttafélög. Þá hyggst félagið sinna flokkun og meðhöndlun skjala fyrir meðal annars ríki og sveitarfélög.

Atli Sveinn er vel þekktur úr íslenskri knattspyrnu. Hann lék á sínum tíma með íslenska landsliðinu og var atvinnumaður í Svíþjóð. Eftir að leikmannaferlinum lauk hefur hann starfað við þjálfun og meðal annars stýrt liðum Fylkis og Hauka.

Samhliða störfum sínum innan knattspyrnunnar hefur Atli Sveinn einnig starfað sem kennari.

Samþykktir Himnasmiðs eru dagsettar 25. ágúst síðastliðinn og félagið hefur nú verið skráð í hlutafélagaskrá.