Mynstur hefur fest kaup á stafræna markaðssetningarfyrirtækinu Jörg Media. Samhliða kaupunum gekk stofnandi Jörg, Jónbjörg Erla Kristjánsdóttir, til liðs við Mynstur.
Mynstur er óháð, rannsóknardrifin birtingaþjónusta sem teiknar upp mynstrin í hegðun markhópa og birtir auglýsingar á öllum tegundum miðla fyrir hönd viðskiptavina sinna. Mynstur hefur um árabil verið í samstarfi við stærsta birtingafyrirtæki heims, Essence Mediacom (nú WPP Media) sem starfar í yfir 80 löndum.
Jónbjörg hefur starfað við stafræna markaðssetningu og birtingar um árabil, bæði á innlendum og erlendum markaði.
„Jónbjörg kemur með mikla reynslu og sterka þekkingu á stafrænum miðlum inn í teymið. Við höfum áður unnið með henni í samstarfi við Jörg Media og þekktum því vel til hennar fagmennsku og nálgunar. Jónbjörg hefur þegar látið til sín taka og unnið mjög flott starf fyrir viðskiptavini okkar. Kaupin styrkja stafræna þjónustu Mynsturs enn frekar og falla vel að því að sameina gögn, rannsóknir og sérþekkingu til að ná sem bestum árangri fyrir viðskiptavini okkar,“ segir Sigurjón Rúnar, framkvæmdastjóri Mynsturs.
„Ég er stolt af því að tilheyra svona öflugu teymi eins og er hjá Mynstur. Við stöndum á spennandi tímamótum í stafrænum heimi þar sem gervigreind er að umbylta því hvernig við vinnum og það er ómetanlegt að vera umkringd fólki sem hefur bæði metnað og getu til að fylgja þeirri þróun eftir,“ segir Jónbjörg Erla.
